Rom 16 | APZ | STEP | Nakwoe nampohwo Fipisi kako a'amu Senɨkɨliya oso ponjoso hofɨko Anɨtu ne'no uhu'mokuwo'nɨngkohofo somo ufo'mawo'nɨngkisosi kako sekumo se'mahwoso'no sekwo kakimo wopɨngo ulohopmno.

Romans 16

Poul kako hwe moya'mi pi'nɨngo engo somo nje a'amu kuyoho ulɨmentisofoho.

1 Nakwoe nampohwo Fipisi kako a'amu Senɨkɨliya oso ponjoso hofɨko Anɨtu ne'no uhu'mokuwo'nɨngkohofo somo ufo'mawo'nɨngkisosi kako sekumo se'mahwoso'no sekwo kakimo wopɨngo ulohopmno. 2 Oso a'mu Fipi kako Anɨtuye syoho ulohofiyosi kako sekwo'nji humahwoso'no kako Kɨlaisɨmo sɨmeho hi'ntnnono uyalokuso so'no sekwo sekwoe senampi ne pa'nyo umo'nono. Sekwo kakimo wopɨngo ulohofɨkuji umokosyohumamno. U kako yo'mayo oso'no umofonyo ihwoso'no sekwo kakimo ufo'mapmno. Hwapɨngoso kako hwe moya'mi pi'nɨngo engo somo ufo'manto ngko huhwo'nɨmo nɨfo'mawo'nɨngkisiyoho.

3 Oso a'mu Pɨlisila'nji kakoe hwehwo Akwila'nji osiya'u'nji siko ngko'nji Kɨlais Jisasɨye syoho afa'nono iwo'nɨngkuhwone ya'uyoho. Oso hisiya'umne'no nje a'amu ya'uyoho ulalokweno. Oso'no sekwo sikimo njimno. 4 Siko ngkimo nɨfo'ma'mentisiyo so'no a'amu nom'neso hofɨko sikimo wofonjosyano lahonɨngkofi siko poyo imo'nyo'neso siko iyoho miyo'njo imentisiyefoho. Oso'no ngko'nohini isamoyoka mulalokuyohono. O'o, a'amu temtitofo kengo kengo hopi'nonohinoso hofɨko Anɨtumo sɨmeho uyalokwofoso hofɨko osiya'umo isamoyoka mɨkunɨmposo ulalokwofo. 5 Oso a'mu siya'uye ango somo a'amu hofɨko Anɨtumne'no uhu'mokuwo'nɨngkohofo osomne'no nje a'amufo ulalokweno. Sekwo hofɨkimo njimno.

Oso hwe Epinitas sohwo kako nje a'amu ne hweho. Osohwo kako hwaho Esiya sopo humanto kako a'amu Anɨtumo sɨmeho muyo'njo sohonta kako kaki'no uyɨmentisofoho. Oso a'amu sohune'no nje a'amu hwosoho ulalokweno. Oso'no sekwo kakimo njimno.

6 Oso nom'ne a'mu Maliya hnne'no ngko nje a'amuyoho ose ulalokweno. Oso'no sekwo kakimo njimno. Kako syoho yokumpohn'nyo engo yonto sekumo sefo'ma'mentisofoho.

7 I nom'ne hwe hufa'u temtitofo Juta oso mta'ango Antɨlounikasɨ'nji Juniyas ntnne'no ngko nje a'amu hwa'uyo ulalokweno. Oso'no sekwo sikimo njimno. Siko ngko'nji impo'angomo humamotohwonefoho. Oso huhwo sohwa'uye yofeso a'amuapousel so'njo ajwo sopo weho. Osohonta ngko Jisas Kɨlaisɨmo sɨmeho hi'ntnnono muyo sohonta siko Kɨlaisɨmne'no sɨmeho kaki'no uyɨmentisiyefoho.

8 Hwe nom'ne Ampɨliyetas oso hune'no nje a'amuhwe ulalokweno. Sekwo kakimo njimno. Kako nje a'amu ne hweho. Kako ngko hopa nakwoe Hwe Engo sohune'no sɨmonyo yalofoho.

9 Ngko Upanos ne'no nje a'amu hwe ulalokweno. Sekwo kakimo njimno. Kako ngko'nji Kɨlaisɨmne'no syoho afa'njo hwoya'yoho. Osohumo ulɨkuji Sɨtekis oso huhumo ulɨmno. Ngko kakine'no nje a'amu hwe ulalokweno.

10 Ngko hwe nom'ne Apelisɨne'no nje a'amu hwe ulalokweno. Sekwo kakimo nje a'amu hwe kilalofoho njimno. Kako Kɨlaisɨye hungkunomo nto'no inɨngkowalofoho.

Hwe nom'ne Alisɨtoupɨyulas montohwamne'no nje montohwafo ulalokweno. Sekwo hofɨkimo njimno.

11 Hwe nom'ne nje temtitofo mta'ango Heloutiyan oso hune'no ngko nje a'amu hwe ulalokweno. Sekwo kakimo njimno.

Hwe nom'ne Nasisas montohwamne'no ngko nje montohwafo ulalokweno. Sekwo hofɨkimo njimno. Hofɨko nakwoe Hwe Engo sohumo sɨmeho uyalokwofo.

12 Oso a'mu hufa'u Tɨlaifina'nji Tɨlaifousa'nji siko Anɨtumne'no syoho yokumpohn'nyo yalokusiyo. Oso fa'une'no nje a'amu faswo ulalokweno. Sekwo sikimo njimno.

I nom'ne a'mu Pesis osi kako nje nampohweho. Osi kako Hwe Engo sohwoe syohoso yokumpohn'nyo iwo'nɨngkisiyoho. Oso hisi ne'no ngko nje nampohwe ulalokweno. Sekwo kakimo njimno.

13 Oso hwe Lufos oso hune'no ngko nje a'amuhwe ulalokweno. Sekwo kakimo njimno. Oso huhwo sohwo kako Hwe Engo Kɨlaisɨmo tɨfi inɨngkawowo'nɨngkiso hweho. Kona'wohi hi osenohinoho. Oso hisi kako nekwoe na'uyoho.

14 Ngko oso hwe Asinɨkɨlitos, Fɨlekounyo, Hemesɨyo, Patɨloupasɨyo, Hemasɨyo, oso hwanji nom'ne a'amu huhwo sohwanji humalofo sohwamne'no nje a'amuhwafo ulalokweno. Sekwo hofɨkimo njimno.

15 Ngko oso a'amu Filoulokos, Juliya, Neleyos, kakoe konampi, Oulimpas, nom'ne a'amu Anɨtumo sɨmeho uyɨwo'nɨngkohofoso hofɨko'nji humalofo oso hwamne'no ngko nje a'amu hwafo ulalokweno. Sekwo hofɨkimo njimno.

16 Sekwo a'amu anga'no anga'nohino soku, sekwo nom'ne a'amu hofɨko Anɨtumo sɨmeho uyɨwo'nɨngkohofo so'nji noswo'nɨngkuji osopo nuhu'mokohumafɨkuji aho po'nɨmno. A'amu hopi'nono hofɨko Jisas Kɨlaisɨmo sɨmeho uyalokwofoso hofɨko sekumo nakwoe a'amu kuyoho selalokwofo.

Sekwo a'amumo wonyo imokiyo'nyo somne'no i'waho nto'no fiyɨmno.

17 Nje a'amu soku, ngko sekwoe huno somo wasefohoto'monne'no yohono. Anɨtuye hungkuno sekwo upa'nɨwo'nɨngkohofo somo a'amu fehohnjoso hofɨko hwotoho fentɨfi a'amu Anɨtumne'no uhu'mokuwo'nɨngkohofo somo husilo husilofo wolohofantɨfi lohofalokwofo. Osomne'no sekwo i'waho nto'no fiyɨmno. Hofɨko Anɨtuye a'amu ne somo honɨngkano hwasyo osomo ipemotowalokwofo. 18 Hofɨko nakwoe Hwe Engo Jisas Kɨlaisɨye syohoso miyalokuyohofo. Yo'mayo wonyo hofɨkoe sɨmeho umo lonte somo inɨngkowalokwofo. A'amu honɨngkano wonyo osomne'no mosyafɨsiyo'njo osomo hofɨko hungkuno wopɨngoso afofo'nji ulontɨfeso hofɨko hwasyo honɨngkanomo ipemotawowo'nɨngkohofofoho. 19 Sekwo Anɨtuye hungkunomo inɨngkawentɨfi yokumpohn'nyo lohokwofo. Oso'no a'amu ango'meemjoso nto upa'nɨmentohofofoho. Oso'no ngko sekune'no sɨmonyo yalokweno. Ngko olo somne'no nɨmo'nɨngkohoho. Sekwo yahino wopɨngo somo tɨpemafɨkuji osomnohino finɨngkamno. Sekwo oso yahino wonyo somne'no huno apa'no nosyafɨsyɨkutoho. 20 Anɨtu kako nakwoe sɨmeho somo pompengo imokiyo hwapɨngo sohwo kako we'enepi Setenɨmo nɨhu'nahone hwotoho fehwosi kakimo sekwoe sɨfɨlaku'nyo'mo uhumatɨ'montonoho. Nakwoe Hwe Engo Jisas Kɨlais kako sekumo wopɨngo waselohofono.

A'amu Poulɨ'nji humamentohofoso hofɨko a'amu Loummjo somo nakwoe a'amufoho ulɨmentohofofoho.

21 Timouti kako ngko'nji syoho afa'nono iwo'nɨngkuhwoyo sohwo kako sekumo nje a'amufo selalofoho. A'amu nom'ne hofɨko nje temtitofo mta'ango sohwa Lusiyoasɨyo Jesounɨyo Sousipata oso hwanji hofɨko nakwoe a'amu hwafo selalokwofo.

22 Ngko Tetiyos huhwo'nnonji Poul kakoe mango mta'ni olo hungkunolo ntahonɨngki ngko sekune'no semtɨ'mokiyalokwe sohwo'ni ngko Anɨtumo sɨmeho uyonji olo hungkuno loso selalokweno, Sekwo nje a'amu kuyoho.

23 Ngkaiyos kako sekumo nje a'amufo selalofoho. Ngko kakoe angomo humentanɨngko wopɨngo nɨmokosyohumaho. A'amu kakoe angomo Anɨtune'no uhu'mokuwo'nɨngkohofo somo kako hofɨkimo wopɨngo ulohofɨwo'nɨngkisofoho.

Elasɨtos sohwo kako olo ango loponjo hwe engo hwaho mokosyohumawo'nɨngkohofo sohwa hofɨkoe iyoswo hamniyoho'njo yo'mayoso nto'no emokosyohumawo'nɨngkiso hweho. Oso hwo'nji nenɨngkwa'wehwo Kwatosɨ'nji siko sekumo nekwoe a'amufo selalokusiyo.

24 [Nakwoe Hwe Engo Jisas Kɨlais kako kakoe yahino wopɨngoso sekwo hopi'nonohino sokumo ufehu'mokasesyono. Nehopeho.]

Nakwo Anɨtuye yofe woho'nomano.

25 Ngko Jisas Kɨlaisɨye hungkuno wopɨngo losetɨhwawo'nɨngkoheso Anɨtu kako oso hungkuno hiso'nji sekumo yokumpohn'nyo sesofitofoso hoponoho. Oso hungkuno hiloso hohonta hiyaso'mo wo'mojoso olohonta Anɨtu kako utɨhwa'nyopo ujo mehontojwahumasofoho. 26 Anɨtu kako songo ne'no humaso osohwo kako a'amumo hungkuno uyahonɨngki lɨmotofo sohwa hofɨko olo hungkuno homo losomo ifalifaliyo mtɨ'mokumentohofofoho. Oso'no olo hungkuno hilo so'no Anɨtu kako syoho hiso nejopahonɨngki nakwo sekumo selalokuhwono. Oso'no temtitofo hopi'nonohinoso hofɨko oso hungkuno hiyaso'mo wo'mojo so'no huno uyahonɨngki hofɨkoe hunoso ehohosɨhumentisofoho. Oso'no a'amu hopi'nono hofɨko oso hungkuno homo somo sɨmeho hi'ntnnono uyɨkuji kakoe yahino wopɨngo somo nuhwonɨngkuji tɨfi unɨngkapɨfe. 27 Oso Anɨtu huhwo sohwo kako'nohini huno hwapɨngo'njo hweho. Yo'mayo kakoe hwomu Jisas Kɨlais nakune'no naloho'mentiso oso'no nakwo Anɨtuye yofe engolopohamo woho'nomehwano.

Oso hungkunoso nehopeho.